Ma Easter Bonnid
by Jenny S Stewart

Ah planned a reeg aroond iss hat an thocht ah'd be sensation,
New skirtie bocht an bag an shoes fair filled me wi elation,
Admit ah'm choost conceited cat, ah love till look ma best,
Although ah'm lek e nyuck at times, ah go till town fan dressed.

So, tried id on an swanked 'fore mirror thinkin "fa's lek me?"
Twistin lek a dowg wi flech ma rear view for till see,
Merched doonstairs till flor 'fore mam, id met wi hur approval,
Anither teet in gless 'fore contemplatin reeg's removal.

Then Saturday dawned bricht an sunny, rubbed ma hans wi glee,
Ah nivvur noticed getherin clouds a' gangin up on me,
A day-long fou' some shooer o snow, no thochts o gien in,
"Straw Basher" lyin srapped in tissue, ready, fit a sin.

Undantued, found anithur cep an thocht "ah'll toff iss up,"
Twa roses, button-holl fey weddin lyin in a cup,
A feather brooch in sorry steyt responded till a brush,
Stuck in wi twa bress safety-peenies, end result wiz lush.

So Chenny hed an Easter bonnid, wan way or anithur,
Although e sicht o a yin snow hed pit hur in a dithur,
An better days are coming soon, ah'm sure ah'll get ma chance,
Till sport ma gran blue bonnid at ma special cocky stance.