AI TRINKIE by W T Lyall

Ye michtnaa get ai weather o' ai sunny coast o' Spain,
Thurs times ye'll hev till pack yur bags an'scatter feh ai rain,
An' if ades kinda breezy don't shelter feh ades source,
Ye canna beit a good win' tan, as long's ade's no gale force.

We've no pollution problems lek they hev in many toons,
Ade's only when thurs heavy rain ai water's kinda broon
Ade's murky for a whilie, but soon we look wi' pride,
Ai trinkie gets a good wash oot, wi' every rushin' tide.

Ai council squad wi' brooms an' spades, an' screipers come till clean,
They slosh ade all wi' whitewash an' get rid o' seaweed green,
Then when ai tide spills our ai wall, an' all their work is done,
They watch ai crystal water, sparklin' bonny in ai sun.

An' now ai bairns come rushin' doon till paddle an' till skint,
Ai beeg chiels at ai deep end do a demonstration sprint,
Thur's plenty little poolies far ai toddlers lek till play,
Fit a screimin' an' commotion on a lovely sunny day.

Ai young chiels climb ai diving board, an' dive in feh ai top,
Fit wis meant till be a chack-knife, turned oot a belly flop,
An' when they've swam an' dived enough an' tired o' all their fun,
They sit an' dry on sheltered rocks, an' bask in a trinkie sun.

So keep yur Costa Brava wi ades sundrenched golden sands,
Tenerefe an' Malta, an' costa fortune lands,
I widna swap yur package deal for all ye tourists flock
For a picnic at ai trinkie an' a scamper roond ai rocks.