Fit’s New - Jenny Stewart

Weel, Cheordie, fit’s e crack e day ye gethered in e toon?
Ah spoke till Robbie Bremdur, wumman, yin’s a fine lek loon,
A fine lek loon? For hivvin’s sake, yin’s nothin boot a drouth,
Ah’m no sayin he’s a liar, boot a stranger till e truth.

Ach, had yur towng, yur nivvur pleyzed wi any chiel ah mention,
Sometimes ah rue e day ah left ma work till lift ma pension,
Now Cheordie, at’s enough o at, fir ithur’s new an fresh?
Oh Wullie Gunn, is cheyngin a his nets for smaller mesh.

An Beelig Gunn hez ingine trouble, canna get a peep,
An Donnal Bain took too much on, ah hear he’s in richt deep,
Jemmy Groat hed forty boxes, at wid fetch a lot,
Ah howp yur pleyzes wi all ma news, ah think id’s a;; ah’ve got.

Ach Cheordie, at’s all fishin news, d’ye no hear no scandal?
Aye, Jock Macfadge wiz caught in D.R’s tryin till steyl a candle,
At’s more led id Cheordie boy, fit else lek at is new?
Checkie Williams got a sack for signin on e Broo.

An at’s yur lot now Bella Budge, awey an shake yur matties,
Seekind thochts ma bowg’s fair groanin, go an peel a tatties,
Cheordie Budge, ya cheeky trosk wi yarns o fish an drink,
E nixt ye’ll hez a gret beeg cheyne til tie me till e sink.

Weel Bella, if yur goin till girn choost mind, thur’s plenty weemin
Wid gie wealth till be ma wife wi very little scheemin,
Ach Cheordie, take a look in gless, yur bald an teeth long gone,
Wur far too owld for pertin now, we’ll choost leyve weel alonn.