E Christmas party season's roond e coarner in December,
E shops remind us, hingin tinsel up by mid November,
Now bairnies practice Christmas plays aboot nativity,
Write letters off till Santa, sing bricht carols lustily.
Id takes me
back till parties spent richt here in wur kirk hall,
A Christmas treyt for Sunday school, ye's welcome wan an all,
Wi garlands dreyped across e roof, an gret beeg peyper bells,
Excitement rippled through e hall an walls bent wi wur yells.
Dressed in finest party gear, yur feyss an hair washed clean,
New white socks an fancy shoes, ye feelt choost lek e queen,
Ah mind e first time ah wore stockins, thocht ah wiz whole cheese,
Ah slid on ice fan walkin homm an laddered all ma knees.
Ah often think on fit we et, gran sangwidges an cake,
supplied by teychurs wan an all, as much as yet could take,
A bag o crisps, a cup of tea an then ye roonded off,
Wi fruit an chelly on a saucer, dined choost lek a toff.
No party wiz complete athoot some greedy little loon,
At et too much an then got seek as we wiz runnin roon
Enchoyin all e party fun, an chynin in a game
O fairmers den or blind man's buff, ah'm sure thur still e same.
An as wur energy wore doon we gethered roond e tree,
Till hear e Christmas story then sing carols wi gret glee,
A parcel dished oot at e door, clutched ticht in podgy han,
An herty fill o baby Jesus' birth in far flung lan'. |